Location: ქ.თბილისი,თამარ მეფისა და დავით აღმაშენებლის გამზირის მიმდებარედ
პროექტი წარმოადგენს მრავალფუნქციურ კინოსტუდიას თბილისის თამარ მეფის გამზირის მიმდებარე ტერიტორიაზე. მისი მიზანია არსებული ფრაგმენტული და ნაკლებად ათვისებული სივრცის გარდაქმნა დაკავშირებულ საზოგადოებრივ გარემოდ, სადაც ერთიანდება კინო, განათლება, მედია, დასვენება და სოციალური აქტივობები. კომპლექსი მოიცავს კინოსტუდიას, საგანმანათლებლო სივრცეებს, მედიაბიბლიოთეკას, საზოგადოებრივ სივრცეებს, სასტუმროსა და დამხმარე ფუნქციებს. არქიტექტურული კონცეფციის საფუძველს წარმოადგენს კავშირი და მოძრაობა. ტერიტორიის გავლით შექმნილია გამჭოლი საფეხმავლო კავშირების სისტემა, რომელიც ერთმანეთთან აკავშირებს ქუჩებს, საზოგადოებრივ სივრცეებსა და კომპლექსის სხვადასხვა ფუნქციას. მოძრაობის ეს ქსელი პროექტში წითელი ბილიკებით გამოიხატება, რომლებიც სივრცის იდენტობისა და ნავიგაციის მთავარ ელემენტად იქცევა. შენობათა განლაგება პასუხობს არსებულ ურბანულ სტრუქტურას და აერთიანებს საცხოვრებელ და საზოგადოებრივ ფუნქციებს. მოცულობებს შორის შექმნილი ეზოები, გასავლელები და ღია სივრცეები უზრუნველყოფს ტერიტორიის გამჭვირვალობას და ქმნის უწყვეტ საჯარო გარემოს. კინოსტუდია კომპლექსის კულტურულ ბირთვს წარმოადგენს, ხოლო მედიაბიბლიოთეკა და საგანმანათლებლო სივრცეები მის ფუნქციას აფართოებს და ქმნის სწავლისა და შემოქმედებითი საქმიანობის შესაძლებლობას. ლანდშაფტი ამ სისტემის განუყოფელი ნაწილია — წითელი საფეხმავლო ბილიკები, გამწვანებული სივრცეები და საზოგადოებრივი ზონები შენობებს ერთმანეთთან და მიმდებარე ქალაქთან აკავშირებს.
